Letras Galegas 2026

Con motivo da celebración do Día das Letras Galegas,  trataremos de dar a coñecer ao alumnado á escritora homenaxeada, Begoña Caamaño Rascado, con actividades de diversa índole.

Do mesmo xeito, aproveitamos  para  traballar, nesta semana, a outros escritores en lingua galega e con recoñecemento no Día das Letras, dende 1963. Entre eles, Rosalía, Curros Enríquez, Castelao, Luísa Villalta, Xela Arias, Eduardo Pondal ... o resultado final foi este orixinal mural dedicado ás nosas  Letras. 

 

TAfondamos na vida e obra da escritora Begoña Caamaño, a homenaxeada deste ano,  dun xeito  atractivo e lúdico, a través de diversos textos, xogos interactivos e con entrevistas realizadas a persoas que a coñeceron e tivemos a sorte de que colaboraran con nós, aportando información moi valiosa. Logo  algúns nenos e nenas participaron na gravación dun interesante podcast relacionado coa súa biografía e que compartimos con todos vós na nosa radio "ZoadeiraRadio".

Dexamos aquí o programa de radio completo no que colaboraron os nenos e nenas da clase de 4º curso, xunto con outros compañeiros e compañeiras do centro.👂

Continúa a semana e seguiremos festexando esta conmemoración que é tan nosa, con actividades diversas.

Feliz Día das Letras Galegas! 

Emocionados cantamos o Himno de Galicia.

Lectura en familia con Jesús.

Lectura en familia con Jesús

No día de hoxe, desenvolveuse na nosa aula unha nova actividade de lectura en familia. Contamos coa colaboración de Jesús, pai de Alexandre, que nos leu o libro titulado, "El Principito" de Antoine de Saint-Exupery.  Alexandre fixo unha garimosa presentación de seu pai  no que todos nos emocionamos un chisquiño.

O Principiño é un neno viaxeiro que vive nun planeta moi, moi pequeno, onde hai tres volcáns pequeniños e unha rosa á que coida moito.

Un día, decide viaxar polo espazo para descubrir o universo. Na súa viaxe, visita outros planetas e coñece a adultos moi raros: un rei que só quere mandar, un home que só conta cartos e un vanidoso que só quere que o aplaudan. Ningún deles sabe o que é xogar ou ser feliz.

Finalmente, chega á Terra e cae no deserto. Alí faise amigo dun aviador e dun raposo moi listo. O raposo ensínalle o segredo máis importante do mundo: as cousas máis bonitas da vida non se ven cos ollos, senón que se senten co corazón.

Ao final, o Principiño entende que a súa rosa é o que máis quere no mundo e decide volver ao seu planeta para seguir coidándoa. 

Escoitamos a Jesús con moita atención e a súa lectura ofrécenos unha fonda lección sobre o que realmente importa na vida.

Fainos reflexionar a todos sobre a necesidade de protexer a nosa capacidade de asombro e a nosa inocencia, fronte á tendencia dos adultos a darlle demasiada importancia ao material, ás aparencias e ás cifras.

 O máis bonito dunha persoa non é a súa roupa nin os seus xoguetes caros. O máis importante é o seu corazón, a súa bondade e como nos fai sentir. 

Somos responsables do que coidamos e domesticamos, o que nos obriga a manter un compromiso constante coas nosas amizades e seres queridos. 

O tempo que dedicas ás cousas e ás persoas  é o que lles dá valor e o que crea vínculos auténticos e nos fan sentir ese amor e cariño tan especial. 

Non o esquezas,  o realmente importante é invisible aos ollos. Debemos valorar sobre todo as boas relacións cos demais, os sentimentos que nos unen e os momentos que pasamos cos seres queridos, cos amigos e familia, por riba das posesións materiais sen mesura que en moitas ocasións son a causa de desavenencias e grandes conflitos.

Quen vive obsesionado con posuír as estrelas, non ten tempo para a amizade nin para gozar da vida.

Grazas, Jesús, por compartir o teu tempo con nós.

 👏👏👏

Día do libro 2026

Co gallo da celebración do Día do Libro, o alumnado de 4º curso queremos animar a todos e a todas á lectura. Nós descubrimos que abrir un libro é como acender unha lanterna na escuridade,  sempre te leva a un lugar novo e marabilloso. Compartimos con todos vós as nosas lecturas deste curso, desde contos clásicos que nos fixeron reflexionar, ata cómics e novelas de aventuras que nos mantiveron en vilo. Cada páxina foi unha oportunidade para deixar voar a imaxinación porque cos libros todos os soños están ao alcance da man. Estas son as portadas dos traballos realizados en relación a aqueles libros que nos pareceron máis divertidos e interesantes. Case todos foron valorados con cinco estrelas, iso quere dicir que nos gustaron moitísimo🌟🌟🌟🌟🌟

Nesta presentación podes ver as nosas recomendacións 👀👇

Diseño de Xoaquinlorigazoadeira

Aproveitamos esta celebración para sacar os libros da biblioteca ao patio do colexio e buscar un recuncho ideal para ler os nosos libros preferidos. Foi un día diferente, pero moi divertido.

Lectura en Familia con Soraya

Soraya, nai de Gael

O xoves, 16 de abril, desenvolveuse na nosa aula unha nova actividade de lectura en familia. Soraya, nai de Gael, falounos de Francia, de París e de todos os símbolos que representan a esta nación.

A partir de agora, cando escoitemos falar do galo coa bandeira tricolor, dos croissants, a boina, a Torre Eiffel, a baguette, a Marsellesa ... saberemos que estes son  símbolos que representan a Francia. E de xeito lúdico,  comezamos a sentir unha enorme  curiosidade por coñecer a súa lingua, o francés, falada por máis de 300 millóns de persoas nos cinco continentes: Europa, África, América, Asia e Oceanía. É idioma oficial en 29 países, como Francia,  Bélxica, Suíza, Luxemburgo, Mónaco e en moitos países do continente africano. Non imos esquecer que palabras que empregamos habitualmente na nosa vida diaria como gourmet, chef, carné, chalet, hotel, canapé, menú, chalet, chapeau, e moitas máis, proceden desa lingua tan fermosa. Con esta presentación facilitada por Soraya,  resume parte da súa intervención.

Logo convidounos  a participar na nosa primeira clase de francés,  un idioma diferente ao noso, pero moi, moi bonito.

En pouco tempo xa fomos quen de levar unha pequena conversación e saíunos moi ben. 

Despois escoitamos un conto, mellor dito, unha fábula titulada, "A cigarra e a formiga", cunha moralexa que nos pareceu moi apropiada: "Traballa sen descanso para conseguir os teus obxectivos e logo ser máis feliz" . Desfrutamos moito con esta historia  na voz de Soraya.

Con esta actividade aprendemos moitas cousas de Francia e do francés e sentimos un enorme desexo de visitar este país, de coñecer a súa gastronomía, os seus costumes  e por por suposto a súa lingua, o francés.

Grazas, Soraya, por regalarnos un pouco do teu tempo, tamén polos agasallos, por ese pan tan rico😋, a baguette, os croissants e por  compartir con nós unha experiencia tan interesante e divertida.                                      

Moitas Grazas!